由香港大學轉去英國大學分享

July 12, 2021
好多同學大學讀咗成年先發現唔啱自己,有人會揀砍掉重練 quit U再報過JUPAS,有人就寧願快快手讀埋去?但Thomas就選擇咗條更唔同嘅路,就係由HKU轉去英國讀year 2

大家好!我係由香港大學 transfer 去The University of Sheffield 就讀mechanical engineering 嘅second year direct entry student,Thomas。

點解當初會 trans U?

「其實你GPA 唔差,點解唔讀CIVIL啊?」的確,香港就係一個咁現實嘅地方,畢業後第一份工嘅人工,往往成為咗考量其他人能力嘅一個指標。喺香港讀機械工程 ,永遠都會俾人有種籮底橙嘅感覺,「咪就係一堆讀唔到CIVIL嘅人囉! 」

即使你對 mechan 幾有熱誠,幾有夢想,當其他人見到你揀mechan 做major, 都會唔多唔少有一分猜疑。講真,如果我讀mechan 嘅原因係因為細個想整iron man 副甲又同你講咩?我深信讀得mechan 嘅人,心中都會有個想像,唔一定係去改變世界,但至少會覺得自己能夠創造一啲有趣嘅嘢,改變自己未來嘅生活。

半年前,有次同屋企人傾偈嘅時候講到係香港讀工程嘅文化,同埋未來發展嘅機會,佢地紛紛皺哂眉頭。咁「東家唔打咪打西家囉!」當刻嘅我開始萌生出轉校到英國繼續升學嘅念頭。雖然都唔係太清楚喺英國讀mechan嘅文化,但係喺家人嘅鼓勵之下,最後都決定試一試。

轉去英國讀難唔難申請?

一開始都係抱住試吓當真嘅心態,膽粗粗咁send email去聯絡一大堆英國大學所屬嘅admission team。所面臨嘅問題就係一啲比較出名嘅大學都拒絕取錄direct entry student,反而問我有冇興趣由year one 開始讀。慶幸嘅係當中有三間大學願意俾second year direct entry 嘅offer我,最後比較咗三間大學所提供嘅課程,就揀咗Sheffield 完成我餘下嘅學士課程。

喺英國讀書同想像中有咩唔同?

未嚟英國嘅我,成日都會有一種感覺,覺得係英國讀書點都比係香港讀得輕鬆一啲。點知去到英國,上完induction talk,一下子將我由天堂打落地獄。英國大學強調學生嘅自主性,課程嘅實用性同埋學科嘅專業性。一星期四十個鐘嘅溫書時間,包括瘋狂睇readings,做一堆problem sheets,每星期考某科嘅quiz,熟習唔同喺港大未掂過嘅engineering software 同埋讀finance and law已經不在下話,每星期最少一次嘅lab session 更令我疲憊不堪。

以前喺港大做lab, 前一晚好彩記得print lab sheet 已經算係做咗唔錯嘅準備,因為大部分嘅lab 都唔需要自己親手去做,抄吓data,影吓相就夠做lab report。但係喺Sheffield 做lab,喺做lab 嘅一個鐘前,係require 完成哂pre-lab quiz,熟讀做lab 嘅程序,以及了解背後嘅理論。由於professor 係假設咗你對lab session 有充分嘅準備,所以一入到lab,professor 只會講幾句開場白就由得啲學生一人一個bench 自由發揮。假如你冇好好咁準備,入到去lab 只會成程「企咗係到」,咩數據都拎唔到,完成唔到post-lab。當然如果你真係唔識點用啲機器,啲technician 都會好樂意去教你點用,但係到最尾都係要靠自己完成個lab。雖然暫時喺Sheffield 做完lab,唔駛交lab report, 但取而代之嘅,就係喺continuous assessment 考返關於lab 嘅問題,所以工作量絕對唔比交lab report 低。

總括嚟講,係英國讀書除咗有啲chur 之外,大致上都同預期唔係有太大嘅落差。即係咁講,只要你做好準備,唔好因為急住走而草率咁去安排,咁應該都唔會「滑鐵盧」嘅。如果大家有差唔多嘅情況亦都有類似嘅planning,都歡迎問我。

有相關問題想問分享者?

我哋可以幫你聯絡分享者,由佢地直接解答你嘅疑難!

聯絡分享者