大家好，我喺 Helen，我喺香港讀完 Product Design Degree 後，一畢業就出黎做產品設計師，但意識到香港製造業漸漸式微，市場同發展空間都唔大，連生存都好難嘅時候就更莫講話要求有晉升機會。所以好快就轉咗行做 UX Designer 。但係返咗幾年工之後事業開始去到樽頸位，就算有晉升機會都未必輪到我，所以最後就毅然決定去加拿大進修。
點解唔留係香港進修？
UX呢行喺香港仍然係算新領域，大家都係摸石過河。呢行最重視嘅就係 Critical thinking（批判性思考），但係坊間好多短期課程（人稱Bootcamp）質素非常參差，一黎唔會教你點用UX嘅角度思考，二黎好多課程都不受認可，導致香港公司其實都唔太會選擇 bootcamp出身嘅設計師。其實都合理，點會讀3-4個月就可以代替人地1-2年既課程？既然係咁，倒不如出走香港，搵下外地受認可又有質素嘅課程黎進修之餘，又可以體驗一下外國教育同生活模式，一舉兩得。
註：UX（User Experience）亦即係使用者體驗。UX Designer 需要進行唔同嘅用戶體驗研究同埋用戶體驗設計。
點解揀加拿大？
加拿大相對其他國家治安良好，人又友善親切，本身更加係移民國家，香港人會容易適應好多。Ottawa又被人稱「北方矽谷」，IT業亦求材急切，對IT人黎講係好完善既發展地方。雖然天氣方面需要時間黎適應，但綜觀對我嚟講誘因都大，所以好快就揀咗呢個城市同國家了。
我當時係選擇咗 Algonquin college嘅Human-centered design課程。Algonquin College位於Ottawa，由於係重點College之一，所以週邊都好多配套設施，所以都算係比較方便嘅College。呢間College嘅實習課程都廣為人知，所以雇主都好樂意請返啲畢業生！
港人如何適應加拿大天氣？
對香港人黎講，加拿大最難適應嘅應該係天氣，我果陣都用咗唔小時間適應咁嘅氣候。如果香港人想過黎生活，我建議選擇7-9月左右既時間，天氣唔會太極端，容易適應。
香港天氣潮濕且悶熱，但好處係日夜溫差不大，唔需要太過花技巧黎選擇衣著。加拿大就啱啱好相反，就算係夏天，亦係非常之乾燥，冬天情況就嚴重得多，加上室內多數會開暖氣，皮膚乾燥情況可媲美沙漠，亦因為咁而成日有靜電。如果有濕疹或皮膚敏感人士就要特別注意護理皮膚。
好多人話去外國生活一定要識揸車，呢句話套落加拿大就再調合不過。加拿大有啲城市冬天可以低至零下40度，呢種天氣係室外留10分鐘已經係極限，但加拿大嘅巴士好多時等候時間都20分鐘以上。所以無車牌就要更加慎重選擇自己嘅居住地方，例如要近車站咁，唔係嘅話連等巴士都會成為你人生中一大考驗。
好啦今日講住咁多先，如果你有任何關於入行做 UI/UX Desginer 或者去加拿大讀書同生活嘅問題，歡迎嚟 SHARLO 問我啦！
