香港物理治療師移民美國 | 點攞執業資格?

我叫Marco，早係幾年前喺理工物理治療系一畢業，移民潮仲未開始前就已經決定移民美國，主要有以下呢幾個原因：

1. 唔想留係香港，覺得香港生活壓力大
2. 對香港未來唔樂觀，趁後生出去見識世界，創造屬於自己的生活
3. 物理治療係香港大多係醫院做，而我唔太鍾意係醫院環境做
4. 想將來仔女有另一個身分，唔洗被迫留在香港
5. 想進修但覺得香港啲碩士課程冇外國好
6. 外國薪金比較高，而且建立家庭，買屋買車係可以實現嘅目標

點解會揀美國進修物理治療？

香港人以物理治療專業移民美國嘅唔多，而我所知大多數都係去英國，澳洲，新加坡等國家。我當初選擇美國係因為覺得美國職業球隊同運動嘅生態好吸引，而且學校選擇多、水平高，又想行一條冇乜前人行過嘅路。最終被一所大學嘅碩士課程取錄，就正式開始美國生活。

一開始到美國東北部一個城市，生活都好輕鬆自在，可以做自己喜歡做的事，而且讀書方面亦冇香港嘅大學課程咁大壓力，可以真正感受到生活同工作嘅平衡。雖然家務，買菜，煮飯，洗衫全部要都自己做，但我覺得都係對自己嘅一種磨練，本身亦有心理準備呢啲係必須經歷嘅事，所以好快就習慣。修讀碩士課程嘅一年幾，可以話係基礎年，慢慢學習美國臨床技巧實踐，醫療系統，專業訓練及準備執業資格試。

去美國做物理治療師有咩挑戰？

同香港一樣，為保障本地人才的工作機會，想到美國執業的專業人士往往都會受到官方機構好嚴謹嘅審查，而且唔能夠直接考取執照然後執業。對我黎講，冇前人嘅腳步參考之下了解成個程序，係在美國最大的挑戰。不過，最後都順利考取執業和得到在紐約州的工作機會，向目標邁進。

美國東北部冬天非常寒冷，而且經常有大雪及多雲有雨，令我之後決定往西岸地區發展。西岸加州一年四季氣溫都較温和，而且大多陽光普照，對喜歡沿海城市的人非常吸引。

美國生活就像工作假期一樣，因為美國有很多美麗的風景及地方，令我很多時候都有一種想外出探索的感覺，開車自駕遊，係美國生活一大樂趣。

有無後悔去咗美國？

生活左幾年，有冇想番香港？老實講冇。當然，我有時候亦會掛住喺香港嘅家人，朋友同食物，但除此外，美國嘅生活真係比較適合我。