大家好，我係上年喺 University of West of England (UWE) 開始讀 Bachelor of Physiotherapy 嘅學生 – Neddy。
點解會讀 Second Degree 呢？
見到我嘅年齡大家可能就會好奇點解咁遲先讀 Bachelor degree呢？其實我前年已經係 HKU 度完成左個 Science Degree，但由於香港科研發展落後，加上呢兩年社會發生好多事，自己係職場上亦都唔太順利，所以就萌生咗離開香港嘅念頭。適逢香港移民潮，結果係自己都未清楚考慮嘅情況，我係 2020年5月開始搵 Agent，6月考 IELTS，7月 Interview，8月收Offer，9月就飛左英國，短短4個月就離開咗香港。
UWE 作為一間排名中等既大學，物理治療算係當中比較出名嘅科，有趣嘅係我地有個前特首同佢老婆都係喺呢度讀書而認識。
第一年係學業上亦都未算辛苦，俾左好多時間我去適應英國嘅生活，接落嚟我會介紹下自己係呢幾個月「衣食住行」既經驗。
Bristol 讀書住邊度？
Bristol 位於英國西南面，屬於沿海城市，鄰近比較出名嘅城市有 Bath 同 威爾士嘅 Cardiff。我自己現住喺大學嘅宿舍，基本上大學提供嘅地方亦都算舒適 ╴單人房連套廁，相比起之前住係 HKU 嘅舍堂亦都大好多。我地一個 Flat 入面有6個人，我同啲 Flatmate 都會成日傾計，煮野食，出去行下。如果有傢俬需要購買，亦可以去成幢高嘅 IKEA到睇下，基本上要用到嘅生活用品都可以好方便買到。
Bristol 天氣係點？香港人過到去會唔會好唔慣？
天氣方面，雖然 Bristol 已經係西南面算係比較暖和，但冬天都會跌到落去零下幾度，不過好在所有室內地方都會有暖氣，所以唔洗太驚。我9月到步嘅時候亦都係長期維持10-15度，所以天氣上都比起香港焗住果種感覺好好多。但係 Bristol 長期都天暗暗同落雨，1個星期基本上得1-2日係會見到陽光，如果撞正果幾日要上堂，就真係成個星期都唔會見到太陽。
外國讀書係咪一定要識揸車？
Bristol 市內嘅交通主要都係巴士，好多都好快就去到目的地，以我住嘅地方為例，M1巴士10分鐘一班，只需10分鐘車程就可以去到市中心，快過出入紅隧。但如果要去啲小鎮，班次就會疏好多，30分鐘一班而且經常遲到，尾班車亦只係去到10點，所以交通上視乎係會經高速公路定小路，時間上都會差好遠。
如果想去超級市場買食材同日用品，基本上好多住宿附近都會有至少一間大型超市同幾間細d啲嘅便利店，大約行10 – 15分鐘或者搭巴士基本上都會好快去到，不過最好嘅方法當然就係自己揸車，泊喺超市門口嘅特大停車場就最快手同方便。
去英國會唔會無啖好食？
如果要知本地餐廳如何，非常抱歉，因為疫情問題好多餐廳都冇開（自己都唔敢入去食），但周圍亦都有好多快餐店，例如 McDonald，KFC，Subway，Pizza，Kebab，基本上都唔會餓親嘅。但我強烈建議想去外國讀書 / 住嘅朋友一定要學識點煮野食，因為喺超市買食材自己煮係平過出面食至少 2-3 倍，而同香港比，無論肉類奶類製品蛋類等等都係平過香港嘅。如果掛住香港嘅食物，亦都可以去中式超市 （中超）到度買到好多中式，日式，韓式，泰式嘅產品。我認知中至少有三間中超都係由香港人經營，出前一丁、鹼魚、豆鼓、生抽、老抽、蠔油、日式咖喱、味琳、烏冬、泡菜同金邊粉都可以買到。如果真係唔識煮野食，都冇問題，中超可以買齊所有丸類腸類，肥牛，湯底，約埋幾個朋友就可以打邊爐，甚至乎某啲中超會有得訂燒鴨、叉燒，絕對唔貴亦非常抵食，我聖誕節就訂左2隻燒鴨同幾位朋友一齊打邊爐咁渡過。
Bristol 雖然唔係一個旅遊城市，但生活上應有盡有，亦都有唔少香港人已經喺度紮根十年，作為啱啱過嚟嘅「新移民」，完全冇適應唔到嘅問題。如果咁多位有疑問，歡迎隨時聯絡我！
