英國生活分享 | 5年英國讀書生活經驗

July 15, 2021
英國香港人移民升學嘅熱門國家。移民英國嘅好處大家就聽得多,今日就等我地睇下去到果邊又會遇到咩困難啦!同埋了解下學港同英國最大分別喺邊。

讀完中五之後,我就去左英國讀A-levels同大學。喺呢五年英國生活之中,我經歷咗好多,亦體會咗好多唔同嘅文化。

英國的天氣

初初嚟英國嘅時候,我好記得我自己一個搭飛機,自己一個 Check-in,自己一個去學校報到。嗰時真係又緊張又興奮,因為我知道人生第二個階段要正式開始。記得我一到步英國,第一感覺就係覺得天氣好凍,空氣好濕。由於英國嘅天氣係濕凍,所以身體感覺到嘅溫度比實際溫度仲要低三至四度,再加埋倫敦天氣成日都陰陰沉沉,有時天氣都會影響到自己嘅情緒。

英國的教育

英國同香港嘅教育制度亦好唔同,眾所周知,香港著名填鴨式教育,好多嘢都係老師俾乜你就讀乜。但係相反,英國就好主張學生自主學習,要自覺去做 Research, 了解更多書本以外嘅知識。除此之外,佢哋都好要求學生有 Critical thinking(批判性思考),要學生識得喺讀過嘅知識入面提出 Argument,發揮突破性思維。所以,如果你覺得只要讀熟 Lecture slides 就可以去考試,咁你就錯曬喇。齋背晒 Lecture slides 上嘅內容係唔會攞到高分㗎,甚至係冇分添。

倫敦的生活

至於倫敦嘅日常生活,其實我覺得同香港有幾分相似。不論係餐廳、地方、設施、超市用品,都幾合香港人口味同習慣。例如一個 China Town 就已經可以暫時幫你解決思鄉之情,俾你買到港式或中式食材過下口癮。所以我會話,香港人喺倫敦生活都唔會有好大問題。

英國可唔可以取代香港?

雖然如此,我認為有啲嘢英國仍然無法取代香港,同埋準備移民英國嘅時候要留意下:

1.   倫敦街頭係有好多 Homeless 同 Druggies,所以可能經常會喺條街聞到大麻,甚至見到一班人圍埋一齊”隊草”。所以,大家夜晚喺條街度要加倍警覺,特別小心身邊嘅人,以免佢哋 High 左傷害你。

2.    倫敦街頭亦有好多扒手,佢哋鍾意 Target 黃種人,因為佢哋覺得黃皮膚嘅人係特別有錢。我有幾個朋友都比扒手偷過電話,銀包,甚至入屋打劫。所以,想移民英國嘅你不妨考慮不用銀包嘅習慣,轉為用 Card holder,直接放喺外套嘅內格入邊!

3.    歧視嘅問題其實係英國都相當嚴重,尤其喺 Covid-19 pandemic。有唔少亞洲面孔都被英國人用過粗口對待,我自己都唔例外。所以大家要做好心理準備,去到異鄉,自己可能會成為二等公民,會比人哋睇低。

4.    倫敦嘅地鐵雖然方便,但係冇冷氣,冇訊號,電話都用唔到。

綜合而言,英國比我嘅感覺係好適合退休居住,因為好多嘢都好方便,又符合香港人生活習慣。但講到要喺嗰度工作,大家就要面對人際上嘅阻滯、天氣帶來嘅負情緒、同英國人自主高尚嘅概念。所以移民之前,一定要做多啲 Research,了解更多當地嘅生活文化,咁先知呢個地方適唔適合你。

有相關問題想問分享者?

我哋可以幫你聯絡分享者,由佢地直接解答你嘅疑難!

聯絡分享者