移民美國生活分享|新英格蘭

July 12, 2021
美國曾經係英國嘅殖民地,所以有好多地名都係喺英國地名前面加個 New 字。今次同我地分享故事嘅就係移民咗去美國新英格蘭地區嘅 Charis 。

點解會揀新英格蘭?

三年前,我一家四口舉家移民美國,喺東岸嘅新英格蘭(New England,即係1620年五月花號抵達嘅東北州分)暫居。選擇東北嘅原因主要有兩個:一,種族較多元 —— 說穿了即係多亞洲人,但又未至於一街都係。二,有親戚朋友喺度定居,大家有個照應。

當年我20歲,因為要趕及21歲成年前完成手續,決定喺港大先休學一年,再另作打算。然而,頭果兩年,父母因為工作關係長期要留喺香港,剩返我同細佬喺果邊相依為命。當時嘅我只不過係個啱啱上完莊住完hall嘅𡃁妹,突如其來嘅家庭主婦生活完全殺我一個措手不及。

美國生活同讀書貴唔貴?

美國快餐出名又平又大件,又有 Costco嗰啲批發倉庫,又多名牌舖頭成日做減價… 但事實係,喺美國長住,你會發現除咗平日買餸嘅菜同生果普遍比香港貴之外,仲有乜都都要俾稅。最貼身嘅係得五個州冇嘅銷售稅,由大概5 至 9.5%不等,某啲鎮仲有額外銷售稅,總共高達13.5%,計計埋埋食水好深。如果你打算喺美國升學,根據政府2019年嘅數字,2017-18學年全國四年大學平均學費高達US$42,681(約HK$331,000)一年。我所屬嘅係一間州立大學,定居一年後成為居民可「享」州內學費,但未計住宿,本科生同研究生每年都要大概 US$18,000-20,000(HK$140,000-155,000),比起香港嘅同儕都係貴一大截。

美國同香港仲有咩大分別?

除此之外,考慮移民美國嘅你,仲需要知道美國極度依賴醫療保險嘅生態。喺美國,保險業盛行係因為好多醫療服務嘅原價都貴到唔合邏輯。舉個例,我嚟到美國第一個月未有保險嘅時候試過無啦啦暈低,當時父母準備打911,本來冇意識嘅我即時嚇到彈起身;友人曾經唔舒服要坐救護車,做完檢查返到屋企終於鬆一口氣,殊不知過兩日收到張盛惠千四美金嘅單。佢心諗,我明明有買保險㗎喎,事後先知原來保險唔包呢樣唔包嗰樣。呢啲林林總總嘅保費同醫藥費,假如你係自僱人士,或者公司提供嘅保險唔全面,長遠嚟講都幾嗱脷。

有無後悔移民?

講咗啲現實要注意嘅地方,再講下個人成長同得著。移民睇落風光,走咗就一了百了,但當中嘅辛酸不為人所道。同所有嘅環境轉變一樣,好多路要自己行,好多板要自己撞,好多嘅苦得自己知。但移民同時令我成長,拓闊眼界去到另一個層次。同exchange或者旅行唔同嘅係,當你真係長時間生活喺個新嘅國度,你嘅角色唔再係一個過客,更加要嘗試融入當地,你會睇多咗試多咗好多嘢。

我好鍾意美國。我鍾意美國嘅多元文化(姑不論融洽程度 ),鍾意美國人唔吝嗇表達情感,鍾意美國冇刻板嘅框架限制人嘅發展。美國作為世界第一大國,乜嘢都有得試,只要你有心肯去做,永遠都有機會畀你。再者,美國唔同地區都有唔同文化同專長,就算係本地人都會成日搬,穿州過省後,總可以去到你理想嘅地方!

有相關問題想問分享者?

我哋可以幫你聯絡分享者,由佢地直接解答你嘅疑難!

聯絡分享者