瑞士留學生活分享 | 係瑞士嘅生活係點?

July 13, 2021
講起瑞士,除咗瑞士糖同「瑞士山區肺」,你仲會諗起咩呢?今日我地就搵咗 Jasmine,分享下自己一個女仔遠走他方讀書嘅日子。

由大城市搬去瑞士小鎮習唔習慣?

講到瑞士,相信大家都會諗起朱古力、雪山同Hotel Management。對於四年前嘅我都一樣,帶住既期待又激動嘅心情,去到一個只係聽左agency介紹而身邊冇人去過嘅地方。

好記得當時人生路不熟,法文淨係識講基本幾句,好幸運當時遇到兩個同樣黎自香港嘅女仔,同我介紹下瑞士嘅生活,發現原來幻想中嘅休閒生活都真係幾悶。當時我揀咗一個喺湖邊嘅campus,諗住喺香港都咁繁忙啦,難得去到瑞士梗係揀番個chill啲嘅地方,點知去到發現原來真係可以得個湖景同埋一間幾百尺嘅超市。如果你想去個發達啲嘅地方就要比成幾百蚊搭火車,仲要好可能只係另一個大少少嘅小鎮。更加唔好講去旅遊景點,一來一回都要幾個鐘,當你心諗咁不如喺嗰度住一晚啦,但係瑞士嘅住宿實在係太貴喇,最後都係死死地氣坐車返去。

咁會唔會好掛住香港?

但正正就係因為咁樣嘅生活配套令到我慢慢學識靜落嚟同自己相處,食完dinner落去日內瓦湖邊散步睇吓個日落,夏天係湖度游個水,仲可以租㗎單車係湖邊踩,去到嗰時先發覺,原來平淡嘅生活都可以好開心。

去到後來做intern,有多番少少錢終於可以上雪山感受下「瑞士山區肺」,真係想再讚下原來瑞士真係好靚好靚,就算嗰度有好多遊客,都仍然無法蓋過大自然帶比我嘅震撼。有一日我同我同學講起好想試skydiving,佢話「我過兩日有假,不如一齊去啦」就係咁我就即刻報咗名,連後悔嘅機會都冇。雖然嗰日我忐忑左成幾個鐘,但係而家諗返都完全冇後悔過,當飛機飛到阿爾卑斯山脈隔離,都未嚟得切欣賞美景,後面個教練就同我講「Let’s go」…跳完既感覺係,瑞士真係好靚。

瑞士其中一個嘅特點就係,同一地方,春夏秋冬四季嘅感覺都好唔一樣,而且去幾多次都唔會厭嘅。

瑞士其實講咩文㗎?

好多朋友都會問我「瑞士係咪講瑞士話架?」,其實瑞士係主要有法文區同埋德文區,好少部分會講義大利文。我主要係法語區生活,連intern嘅時候都淨係得老闆識講英文…同事好多都係葡萄牙人,所以同佢地溝通主要係用唔咸唔淡嘅法文同body language溝通哈哈。

瑞士食嘢貴唔貴?

順帶一提,瑞士物價真係好貴,本地菜式黎黎去去都係得薯仔芝士或者cream sauce嘅食物,但偏偏連China Town都冇... 最後嗰年因為學校近義大利,所以每隔一段時間就會坐火車去米蘭China Town買翻啲調味料同邊爐湯底。

瑞士係一個好適合俾人靜落黎,慢慢享受生活嘅地方,因為當地人生活都比較簡單樸素。但始終移民門檻較高,大家除咗做多啲 research外,最好就係疫情過後親身到訪下再考慮清楚。

有相關問題想問分享者?

我哋可以幫你聯絡分享者,由佢地直接解答你嘅疑難!

聯絡分享者