中學畢業後，我選擇咗去日本 — 香港人嘅「鄉下」升學，展開人生一段新嘅旅程。身為香港人，相信各位就算唔夠錢俾首期都會久唔久「回鄉」消閒娛樂，由沖繩玩到北海道，對日本呢個國家一啲都唔會陌生。大家可能覺得日本買野平食野正，仲有咁多嘢玩，應該幾好住。但如果你真係嚟留學、Working Holiday 、甚至工作嘅話，你絕對會有另一番體會。
點解會去日本生活？
諗返起中學時代，初初接觸日文嘅契機係日本動漫同遊戲。為左睇動畫睇得暢順啲同打機睇得明啲日文講咩，每逢週末都會上日文興趣班。讀日文同睇動畫意外地有相輔相成嘅效果，日文係我眼中漸漸由興趣變成學問，更成為左我去日本留學嘅工具。經過幾年努力，我喺香港考完 N1同 EJU(日本留學試驗)後成功攞到 Undergrad 嘅 Offer，3月隻身就出發去日本以備4月開學。
去日本生活最大問題係咩？
初到日本最大嘅障礙係語言同文化。過去18年喺香港講慣廣東話同英文嘅我突然間每日都要講日文，就算係香港有讀開日文都唔多唔少會有種違和感，覺得自己真係離開左自己嘅家園。落左地搵屋，開銀行戶口，簽電話約等等生活大小事全部都要用日文，因為大多數日本人嘅英文水平都較低，而且喺日本生活嘅外國人只係佔少數，生活喺住宅區就更加少接觸觀光客，英語水平可想而知。再加上日本人辦做嘢死版，唔識變通，當你習慣左香港個效率同節奏，嚟到日本係會被激死。最經典嘅例子係當你想開銀行戶口時，銀行會要求你提供住址同電話號碼等資料。但當你去搵屋同簽電話約嘅時候，對方又會要求你提供銀行户口資料，否則拒絕申請，然後你就會陷入一個無限loop了。
日本多唔多香港人定居？
可能你會問點解所有都要自己一個做，唔搵其他香港人幫？我可以答你，日本雖然有好多香港人來旅遊，只要去任何一個觀光景點都可以聽到廣東話。但真正係日本住嘅香港人少之又少，要搵一個香港人圈子有一定難度。更何況我係日本冇人冇物，所有野要靠自己一個人去開拓。相反，歐美本身已經有大量港人圈子，所以去當地留學同做嘢嘅朋友生活要上軌道就容易得多。
融入日本社會係咪好難？
解決語言障礙同了解當地文化只係一個開始，融唔融入到又係另一回事。日本雖然係個發達國家，但未如理想嘅部分亦都有好多。例如當你以為日本係科技大國，所有野都應該好先進。但實情有部分學校嘅 Report 都仲要用手寫，簽咩約都要準備一個屬於自己嘅印仔，好多傳統而落後嘅文化依然根深蒂固。
咁當然，如果你捱得過一開始嘅適應期，日本其實都係一個唔錯嘅選擇，如果你未來計劃嚟日本讀書做嘢，歡迎 DM 我搵我傾吓。
