我本身有台灣戶籍，但喺香港長大，小學、中學、大學都喺香港，直到碩士先返返台灣。
住台北。其實同香港無乜大分別，都係大城市。但無咁焗促，行人路闊啲，抬頭望到天空而唔係高樓大廈。整體環境係舒適過香港，悠閒啲，節奏慢啲，輕鬆啲。
服兵役嘅生活係點？
1994年之後出世嘅男仔只需要服4個月嘅兵役，入到去其實都係好似夏令營咁，不過係坐監版嘅夏令營。無得用手機、要剃光頭、早睡早起、上堂、開真槍、刺槍、學唔同武器、做雜務，基本上已經概括晒4個月做過嘅野。
暫時未識香港人移民過去要服兵役，不過根據《徵兵規則》，香港男性移民台灣，假如在設戶籍時未超過36歲那年的12月31日，便會在設籍後一年收到應辦理徵兵的通知。同樣，1993年以前出生要服一年替代役，到各個政府機關從事輔助性質的工作；1994年以後出生要接受四個月的軍事訓練，又或服四至六個月替代役。
台灣人係咪好關心政治？
其實台灣嘅政治氣氛唔係想像中咁熱烈，台灣人日常比較少傾政治，睇下台灣播嘅新聞就知咩事。大家比較關心嘅都係社區發生嘅事，除非嗰一年有大型嘅選舉或公投。根據自己台灣嘅朋友、聽返嚟嘅野，佢哋都傾向維持現狀，同中國互有制衡但又唔會去到打仗嘅地步。情況都有啲似以前嘅香港，覺得大家河水不犯井水就得，但事實上共產黨唔會守規矩，等到佢侵犯你嗰日已經太遲。個人認為大部分嘅台灣人無乜危機意識，但係都明白嘅，因為十幾年前嘅香港都係咁。
有台灣戶籍嘅你未來有咩打算？
現階段因為想儲錢，所以最後決定回流香港，比較人工嘅話，同工種香港會高25%-50%不等。越專業嘅行業如醫護，個差距更大。但退休就一定唔會留喺香港。個人覺得香港根本就不適宜居住，更何況養老。台灣有完善嘅全民健保制度，老人家多病痛但有好多野健保都cover咗。除咗香港人成日去嘅台北台中高雄之外，仲有好多寧靜同生活節奏更加慢嘅地方，適合退休生活。
