【要Grant/loan就趁早 一文睇清政府學費貸款】

September 7, 2021

話咁快又開學啦,唔知各位current同番薯民又準備好未呢?除左reg科之外,開學後最緊要就係要交學費,交學費同交學費!(重要的事要講三次,因為如果過咗grace period,而又無交學費,係有機會被取消學籍架!)雖則話九月中左右先要交學費,但係如果想申請學費貸款既同學仔就要提早處理啦。今日就等小編同大家睇下兩個政府學費貸款NLSFT同TSFS 計劃,佢哋嘅所需資料同程序啦~

1.兩個計劃究竟係咩呢?

NLSFT全名為全日制大專學生免入息審查貸款計劃,顧名思義,只要擁有香港居留權(或在課程開始前,你或你嘅家庭已連續在香港居住滿三年),係全日制大學生及能夠搵到見證人同彌償人就可以申請,並未需入息審查,基本上所有人都可以申請。計劃中批出嘅金額全數為貸款,申請人必需償還借出總數及利息。對比起另一個計劃,NLSFT所需嘅文件較少,條件亦較寬鬆,但申請人就未會獲得政府資助。

另一個計劃TSFS係專上學生資助計劃,申請資格同NLSFT一樣,但TSFS批出嘅金額係包括貸款及毋須償還嘅政府資助,而政府資助既金額則以每個案嘅經濟情況決定。只要將家庭全年總收入除以(家庭人數+1),扣除家庭資產淨額,及利用在學資處上嘅對換表,就能找出資助金額。簡單而言,如果經上面公式計算嘅家庭入息超過79,976元,一般來說係唔會獲得任何資助。如學資處最終決定不作任何資助,申請會自動變成免入息審查貸款計劃 。因涉及政府資助,TSFS對比起NLSFT所需嘅文件較多,審批時間較長,學資處亦有權調查申請人所有資金嘅流動。

2.1 如何申請NLSFT

首先申請人可先經上海匯豐銀行或恒生銀行向「044-171080-001」遞交260元行政費,並在正本的正面寫上你的香港身份證號碼(記得保留正本!)。完成付款後,申請人必須在「政府一站通」入面嘅「學資處電子通」通過輸入個人資料、銀行戶口資料、行政費銀行交易通知書的資料等等去遞交申請,然後在遞交申請7日內提交已簽署的聲明書、香港身份證影印本(非香港永久居民可以用證明家庭已在香港住滿3年嘅文件影印本)、學生證(如果係新生可以留位費收據或學費單影印本代替),及載有本人姓名和帳戶號碼的銀行儲蓄戶口存摺首頁或係銀行提款卡的影印本。以上文件可經網上遞交或郵寄至位於長沙灣道303號長沙灣政府合署嘅學資處。

完成以上步驟後,你應該會收到學資處寄出嘅「接獲申請通知書」,並會在三個星期內收到「申請結果通知書」。

2.2 如何申請TSFS

同NLSFT一樣,申請人可於「政府一站通」入面嘅「學資處電子通」提交個人資料等等。不同的是,在申請此計劃時你要詳細列明家庭狀況,包括家庭成員有否領取綜援 , 各人的補助額、收入、資產、住址 , 未婚兄弟姊妹的經濟狀況或就讀院校,銀行存款結餘及股票等等(由於所需資料過多以及因人而異,想知詳情嘅同學可以係申請時同喺學資處網站搵到指示)。

在提交申請7日內,未婚申請人須提交聲明書,本人、父母、與你同住嘅未婚兄弟姊妹既香港身份證及學生證副本,以及在2020年4月1日至2021年3月31日期間上述人士的收入證明文件副本,你父母有關物業/土地/車位/車輛/船隻的文件副本所有存摺及月結單副本、投資項目、與在2021年3月31日存款結餘的證明書。

在繳交以上文件後,申請人將會收到「接獲申請通知書」,在大多情況下,學資處將於90日發出「申請結果通知書」。

3. 接受貸款

申請人應在「申請結果通知書」上指定日期前以郵寄方式或透過學資處的投遞箱把「遞交接受貸款文件前的覆核清單」上列明的貸款文件,包括「承諾書」、「彌償契據」和學生、彌償人及見證人資料表格(表格A及表格B)以及其他有關文件遞交學資處。值得留意嘅係,見證人同彌償人不能為同一人——前者需為為香港居民及年滿18歲;而後者必須為香港居民、年滿21歲、在香港從事有實質報酬的職業、經濟狀況良好、有固定收入、能提供現時在香港的受僱證明文件、最近及連續三個月的收入證明文件、香港最近三個月內的住址證明文件正本及公司地址證明文件。

兩個計劃嘅借出嘅款項將會分為2期,第一期最遲將於遞交全套文件後3星期內發放於申請人輸入嘅銀行戶口,第二期將於約1至2月發放。

記住新生嘅截止日期係喺9月中至10月頭(各院校不同),而舊生嘅截止日期已過,但唔使擔心,因為依個計劃係全年都可以申請,列明嘅日期只係令大家可以趕上各院校學費截止嘅日期。唔知大家申請咗未呢?如果未嘅話,快啲去申請,又或者share依篇文比未申請嘅朋友仔啦!

如果有任何人仲對申請學費貸款有任何問題,歡迎DM我哋 @sharlohk!





尋找相關分享者